Friday, August 12, 2016

NGARIBA ALIYEKEKETA WATOTO WA KIKE ZAIDI YA 5,000 KWA MIAKA 13 AOKOKA

Chief Hope | 1:44:00 PM |
Ngariba Nguli wa ukoo wa Wanyabasi ambaye amekeketa watoto wa kike zaidi 5,000 kwa kipindi cha miaka 13 iliyopita amedai ameachana na kazi hiyo baada ya kuokoka

Ngariba huyo, Mkazi wa Kijiji Rung’abure, Christina Mairo (55) maarufu kwa jina la Wansato alifikia uamuzi huo baada ya kuhubiriwa na wachungaji wa Kanisa la Jeshi la Wokovu waliomtembelea nyumbani kwake kumweleza madhara ya kukeketa watoto wa kike. 

Pamoja na kuokoka na kutangaza kuachana na shughuli hiyo, ngariba huyo pia aliteketeza mkoba wake wenye zana za ukeketaji baada ya kuingiwa na somo la ubaya na madhara ya ukeketaji.

Akizungumza baada ya kutangaza kuacha kazi hiyo na kuchoma moto zana za ukeketaji, Ngariba huyo alikiri kushuhudia mateso wanayopata wanawake walikeketwa wakati wa kujifungua watoto. 

Mairo amesema ameamua kuachana na kazi hiyo ambayo inamfanya kuandamwa baada ya kujua matatizo yanayowakumba wajawazito wakati wa kujifungua. 

Mratibu wa mradi wa kutokomeza vitendo vya ukatili wa kijinsia Kupitia Jumuiya ya Kikristo Tanzanja (CCT), Sophia Mchonvu alisema kwa kipindi cha miaka 10, shirika hilo na wanaharakati wamekuwa wakimtembelea ngariba huyo kumshawishi kuachana na kazi hiyo bila mafanikio. 

"Tukio la ni matunda ya harakati zilizoanza miaka 10 iliyopita. Hii ni ishara njema katika mapambano dhidi ya vitendo vya ukatili wa kijinsia wilayani Serengeti na maeneo mengine ambako vitendo vya ukeketaji vinafanyika," alisema Mchonvu.

Mchungaji wa kanisa hilo, Wilson Mwile alisema vita dhidi ya ukatili vinakwamishwa na imani, mila na desturi kandamizi dhidi ya wanawake. 

Diwani wa Kata ya Rung’abure, Elias Mirengo aliwataka ngariba wengine kuacha shughuli hiyo. Mmoja wa watoto wa ngariba huyo, Rachel Thomas aliwashukuru waliofanikisha mama yake kuachana na kazi hiyo ya ukeketaji watoto wa kike. 

CHANZO: Mwananchi

By Chief Hope 

Jiunge Na Tim Heaven Sasa! 

Jiunge nasi kupitia FacebookTwitter na Instagram ili kupata habari mbalimbali juu ya muziki, mahusiano, mafanikio afya nk.

0 comments:

 
Content By Chief Hope | Facebook | Twitter | Copyright ©2016 TIM HEAVEN